Beladas Ngelibas, Babak Bingkas!!!

Alhamdulillah. Alangke padeknyo Sriwijaya FC maen kemaren lur. Babak bingkas Madura United kito buat. 5-0. Dasar besak uap tadi, kemaren la bekoar-koar nak ngalahke kito. Kamu-kamu nonton galo kan lur? Aku yang nonton di tipi be siru nian, apolagi kamu-kamu yang nonton langsung di Jakabaring, yo dak? Payo la kalu kamu ado yang maco ini, kemaren nonton di Jakabaring, bagi la cerito kamu tu di kolom komen di bawah ni. Kalu aku ni nak sedikit cerito hasil yang kutonton kemaren.

O yo, biar dak saro ngetiknyo, Madura United ni kito singkat be MU (pecak singkatan klub bola Inggris yang punyo gelar liga paling banyak, tapi dak lolos maen di kompetisi Eropa musim depan, heheh…) . Ai jangan jadi cak kebelaga’an kamu tu😀 Iyo, kamu Madura United. Ini biar dak capek be ngetik namo kamu tu beulang-ulang.

Nah, payo aku mulai sekarang. O yo, aku teinget lagi. Ado kemiripan lagi MU sini dengan MU sano, duo tim ini punyo pemaen yang samo miripnyo, pecak kembar nian. Fellaini di MU sano, Ahmad Maulana Putra di MU sini. Budak ini keno kartu merah kemaren. Lah, ngapo laju banyak nyeritoke tim lawan ini. Maap-maap lur🙂

Cerito di Babak Pertamo

Awal-awal lago alangke cemas nian aku lur. Dak pacak idak, keno serang terus samo MU. Ngurut dado jingoknyo, tapi pelan-pelan ku peratike ado perkembangan caro kito maen lur. Pesta kito dimulai dari pelanggaran pemaen MU di depan kotak penalti mereka. Dapet tendangan bebas kito. Kalu jingok posisi nendang samo yang nendang jugo, caknyo jadi nian ini gol. Bener lur, cantik nian tendangan bebas Hilton. Herprast, kiper MU, la nebak arah bola, tapi dak tetepis jugo. Unggul 1-0 kito di menit ke-15.

Di menit ke-29 ampir be kito unggul 2-0 kalu tendangan M. Ridwan dak melenceng. Caknyo mamang kito tu tebawak napsu nak cepet-cepet ngelibas MU, padahal kalu sempet jingok di kotak penalti ado Beto disano. Dak papola mang, men uji budak-budak sekarang tu: nice try😀

Kalu kamu-kamu peratike, caro maen kemaren tu mayan keras jugo yo. Banyak nian pelanggaran, baek kito jugo MU. Berapo kali sempet terenti maen, agak ngerusak tempo maen jugo. Lagi lemak-lemak nyerang tau-tau di pripit wasit, berenti dulu, ado yang cidera. Nah, gol keduo kito ni lagi-lagi dari hasil pelanggaran pemaen MU. Tendangan bebas Eka Ramdani dari daerah pertahanan sebelah kiri MU, ngelambung ke tiang jauh. Herprast pikir dak katek pemaen kito, ruponyo ado Ichsan Kurniawan nyambut bola. Goool… Sampe senga maen, kito unggul 2-0.

Jalannyo Babak Keduo

Di babak keduo, Eka digantike Achmad “Jupe” Jufriyanto terus Ridwan digantike Yohanis Nabar. Tambahan tenago duo pemaen ini tebukti lebih pakam serangan-serangan kito. Dak lamo di lapangan, sepuluh menit lebih dikit, Nabar nyetak gol hasil dari Beto ngolake bek-bek MU terus ngelepas umpan ke kotak penalti. Dasar bek-bek MU tek aguk galo, dak katek la yang nak jago Nabar. Payo la kalu mak itu, tinggal sontek dikit be samo Nabar. Berubah skor jadi 3-0.

Jatah pergantian pemain terakhir dapet di FU15, yoi Firman Utina, gantike Ichsan. Limo menit dari situ, “Fellaini” nyo MU diusir wasit keluar gara-gara nekel Hyun-Koo. Nah, lawan sepuluh pemaen kito. Bau-baunyo pacak nambah gol lagi kalu mak ini.

Kejadian. Dak nyampe limo menit sejak Maulana keluar, Nabar nyetak gol keduonyo. Lagi-lagi dapet umpan dari Beto, sekarang lewat sundulan palaknyo. Kalu kamu-kamu yang nonton kemaren, peratikela, tambah ngaco arut pemaen-pemaen belakang MU. Makin kenceng serangan kito, makin kelabakan pemaen MU.

Seraso nak beterimo kasih dengan duo umpan Beto, Nabar ngenjuk umpan ke Beto buat nyetak gol kelimo kito kemaren di menit ke-90. Kalu kato peribahasa tu, air susu dibales yogurt, yo dak lur😀 Tambahan waktu empat menit, serangan-serangan kito makin nemen. Sebelum wasit pripit tando selesai pertandingan, Hilton masih gocek-gocek bola di sayap kanan MU. Kupikir bakal jadi nian ini senga lusin gol, ai ruponyo dimaen-maenke be samo Hilton, caknyo la kesian dio dengan tim tamu kito.

Payo la lur, semak itu be hasil penjingo’an aku di pertandingan kemaren. Kalu kamu-kamu dulur ado cerito-cerito lain, utamanyo yang langsung hadir di stadion, nak bebagi cerito yang dak ketangkep kamera SCTV, ceritoke di kolom komen dibawah yo.

Salam beladas, kito beringas lawan babak bingkas😀

Single Post Navigation

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: